من هو «فزاع»؟




أنا عنواني اشعاري واسمـي فـي معانيهـا = وأوّل بيت أنا قلتـه غـدا تاريـخ ميـلادي
إذا تنشِدْ عن أخبـاري مـن اوّلْهـا لتاليهـا = أنا اشعاري هي اخباري على ما اْريد تنقادي
وانا أمّي إماراتي ولِدْت وعشـت أنـا فيهـا = وابوي أمجاد عرباني وطاري ماضي اجدادي
واخواني أنا المليار مسلـم فـي أراضيهـا = وانا القرآن والسِنّـه غَـدَوا زادي وزوّادي
أعيش هْمومي وفَرْحي ولا لي نيّـه أخفيهـا = وأكبر همّي المقدس وطفـلٍ جنبـه يْنـادي
يهزّ بْصَرْخته أرضٍ نوى الصهيون يمحيهـا = من التاريخ، والعالم وقَفْ مكتـوف الايـادي
وانا ايّامي هـي اسْتـاذي تعلّمنـي لياليهـا = فـلا خيـرٍ بإنسـانٍ يِفـادْ ولا بَعَـدْ فـادي
و(زايد) قِدْوِتي (زايد) و(زايد) من يزهّيهـا = بلاده شانهـا عالـي باسمـهْ دايـمْ تْشـادي
وروحي (محمّد المغوار) ابن راشد يغذّيهـا = من أشعاره من أفكاره، بنيت بْمجدهْ امجـادي
مرَبِنّي على الجودْ وعلى المعروف واحميها = بلادي حبّي الأول ولا لـي غيرهـا بـلادي

خلاص يعني






خلاص يعني كل شَيّ انتهى وراح = خلاص يعني مـا بقينـا حبايـب
يعني وعودك كلها كانـت مْـزاح = والاّ انت ما لك في المحبّه رغايب
وين العهود ووين لحظات الافراح = يعني تلاشت مع هبـوب الهبايـب
القلب بعدك من له اليـوم يرتـاح = من بعد ما هو في محبّتْـك ذايـب
ياما على شانك تحمّلت الاجـراح = وياما جروحي من صدودك عطايب
سرقتني عن جملة الناس يا صـاح = والفكـر عنـدك ماخذنّـه نهايـب
خِلّك يحبّك يا بَعَـدْ سِيْـد المْـلاح = إن رحت عنّه راودنّـه مصايـب
خَلّك معه دام الهوى حيل نضّـاح = والواش رِدّه يا هوى البال خايـب

ممنوع أخذ الثار


مهداه إلى اللواء ضاحي خلفان تميم






شكواي (بو فارس) على اللي سرَقْني = دامك خبيـرٍ فـي أمـور الجريمـه
شَخْصٍ أخَذْ قلبي وْصَـدّ وْهجَرْنـي = مـن بعـد مـا كِنّـا نديـم ونديمـه
زَور ملفّـات الغـرام وخدَعْـنـي = بعد الأمـور الواضحـات السليمـه
وافي أنـا بْحبّـه ولكـن صدمنـي = والله يا (ضاحي) صَدْمتي به أليمـه
يامـا جَـرَحْ نـاسٍ ويامـا طعنّـي = وياما نَهَـبْ نـاسٍ وْكـلٍ خصيمـه
لا تقول منّي، لا حَشَا هـوب منّـي = ممنوع أخْـذ الثـار ثـاري لزيمـه
بْكَشْف الجريمه أمنكـم مـا لَحَقْنـي = مجرم ما بين الناس هـذي عظيمـه
باعطيك مـن وصفـه ودوّر وعنّـي = واعمل تحرّي فْ.. كل بيتٍ وخيمـه
كانـك لقيتـه لـى شبيـه الدمنّـي = أبـو العيـون الناعسـات العديمـه
أهو الذي بْحِسْنه يا (ضاحي) غلبْنـي = ولا اظن ترضى لي أنـا بالهزيمـه

القضا بالقضا





لا تحاول تعيد بدمعتك ما مضـى = ما تداوي دموعك جرح طول البعاد
إنتهى الحب يا اللى بيننا وانقضـى = ولا بقى لك بقلبي غير ذكرى وداد
كنت أجيك بْخفوقٍ فيه حبّ ورضا = وكنت انته حبيبي غايتي والمـراد
وكنت أشوفك حياتي جوّها والفضا = وكنت يومٍ تغيب آموت هَمّ وْ نكـاد
بس خِذْها بْصَراحه القضا بالقضـا = ذوق كاسٍ شربته منْك اسمه عنـاد
يرفض القلب مثلك به ودادٍ حظى = دامه انسان مثلك قطعةٍ من جمـاد
ما تعيش المشاعر في خفوقٍ فضى = كيف تبني ودادٍ له عنـادك عمـاد
يا فقير المشاعر، يا شتات الشظـا = المحبّه بوادي، وانـت والله بـواد

فارس إبن فارس


حمدان بن محمد بن راشد آل مكتوم يرسم بالشعر أحداث فوز شقيقه أحمد بن محمد بن راشد آل مكتوم
بالمركز الأول..في أسبانيا والزمان..زمن انهمار الشعر من الأب.. إلى الابن..
زمن المكارم المتوارثة أصالة وكبرياء.. حمدان شاعر وفارس أدرك قيمة النصر فمنحه
زخم إبداع القصيدة وقوة حضورها البهي..

فز الشبل من صكّت الحلقه على الابطـان = يوم الشجاعة تنهـزم وتزلـزل الابطـال
يومٍ تخربـط يـا عـرب تتغيّـر الأوزان = رد الشبل في زمجره متحـدّي الزلـزال
فزّ الشبل (أحمد) بقـوّه ترعـب الميـدان = وذاك الأسد قايد يحـرّك بيـده الأشبـال
وقام التحدّي في جبـالٍ خوّفـت فرسـان = و(احمد) بعزمه إنفرد وابعد شرات اللال
لا ما يهمّه صعب كل الصعب تحته هـان = والنصر ما جابه صدف جابه بطولة بـال
يخضع له الفوز بفخر من سالف الأزمان = تاجي وعزّي ومنهجي، يا غيثـي الهمّـال
شيخي وابوي (محمّد) اللي للنصر عنوان = في عيونه يبان التحدّي والصبـر وآمـال
واحمد تعلّى واعتلى هو فـارس الشبّـان = في عيونه يبان التحدّي والصبـر وآمـال
أنا اشهد انّه عاش ع صهوة فرس وعنان = ولا يْبيّن الرجّال كود ان كان ابن رجّـال
ولا اظن بان السيل يجري دونه الوديـان = وحنّـا إذا قلنـا تـراه أقوالنـا أفـعـال
مازان هو بالفوز والله الفوز باسمـه زان = يختال هو بالفوز.. لا إلفوز بـه يختـال
المجد كل المجد من (أحمد) بنى له شـان = والعز كل العز من (أحمد) خصالـه نـال
ما خاب ظنّي فيه يوم الصبح نـوره بـان = الصبح يفرح يوم شاف (احمد) بخيله صال
له غنّت حروف القصيده باعذب الألحـان = والنعم باحمد قلتهـا والحـق بـه ينقـال
فارس ابن فارس إذا قالـوا فـلان فـلان = أحمد بن محمد ابن راشـد ياحـيّ الفـال
يومٍ عزيته فزّ قـال انّـي أخـو حمـدان = أنا اشهد ان الفوز باهدي لك على كل حال

(أمّي)



وش خانة (دبي) وْبَحَرْهَا = مادام شمس (دبي) ما حَدّ
تبكي فيافيها وشجَرْهَا = والطير عيّا ما يغرّد
و(زعبيل) لى مظلم قصرْهَا = ما به سوى صوت الصدى يْرِدّ
وِنْجوم تسأل عن بدرها = لى ينير داجي الليل الاسود
يا شمعة الدار وسفرْهَا = يا امّي من الشوق آتوقد
إن كان شِعْري ما حصرْهَا = الاشواق تظهر في التنهد
تجيب لي النسمه عطرها = لى يْغَار منّه فايح الورد
القلب ينبض به ذكرها = وِطْيوفها في العين ترقد
الله يطولْ في عمرْهَا = وتبقى لنا وبعمرها يمِدّ
وعساه ما يطولْ سفرْهَا = وِلْنا بخير انشا الله تْرِد

أنا في الشعر..


أنا في الشعر ابن هذاك إذا إنته تعَرْف الشعر = أهيجْ في البحور أمواج، أمشّيها على كيفي
واقول لك لا تجاريني ترى أمشي بدربٍ وعر = واذا تبغي تجاريني ترى لك صامدٍ سيفي
ولا تضمن تحوز النصر وانا بحرٍ وانته نهر = واذا عارضت تيّاري تبرّى موجي وْسِيْفي
وكم من واحدٍ غيرك تعرّض لي وجاه الكسر = ودارت به هبوب رْيَاح في أقوى عواصيفي
تهاجم سايل الأقلام وسطرٍ ما يهزّه سطر = وإنته وينها افكارك عن بْيوتي وْتهديفي
تبا روس العلا وانته تحوّل في طريقك حدر = تحاول بس ما تِقْدَرْ بأن توصل مشاريفي
نجوم الليل ماتنوِرْ إذا بيّن شعاع البدر = وش اللي يجمع الوسمي على سحب ورْعد صيفي
تشوف الجاذبيّه لي في هالدنيا تجرّك جر = أنا عكسه أفرّك وين ما أبغي على كيفي

تشوفون الشِتا والصيف تشوفون السحب وأمطار = تشوفون الشَجَرْ والطير وأمن وخيرنا سايد
تشوفون الفَرَح يالّلي يداعب وَرْدة النوّار = وفجرٍ يا حلا صبحه نسيمه عِطْر مِتْزايد
تشوفون البَحَر والبَرّ، جبِال وتحتها أنهار = تشوفون الأراضي كلّها تِزْهِر لاجِل واحِد
لاجِل مَن وَحّد الدّوله زعيم وقايدٍ مغوار = أبونا وشيخنا (زايد) ومَن مِثْلِه لنا قايد
بَنى مَجْد وبنى عِزّ وبَنى صَرْح الوطن باصرار = بَنى شَعْبٍ تحَت ظِلّه فِدى لْهذا الوطن صامِد
فيْ عيده غَنّت الفَرْحه طَرَبْ واستبشرت به دار = وداره دام هو فيها، نعيم وْخيرها وايد
تهَلّيْ بْعيده السامي وتسمو باسمه المختار = و(زايد) بالفِعِل زايد و(زايد) حبّنا الخالِد
أنا اشهد بانّ ذا العالَم إذا بْيومٍ نوى يختار = حكيمٍ يَفْخَر باسمه، نَعَمْ ماله سوى (زايد)

العظيم الله وانا مُؤمن بها كَلمة عَظيم = والحياه بْها رسُل مع أنبيا وْصحب وْكرام
والكتب لي م السَما الإنجيل والعهد القديم = والختم قرآن أنزل بين مَكّه والحرام
والرسول المصطفى محمد لنا خير وْنعيم = كان أمّي وراعي اغنام وهدى بْنوره أنَام
والزمن دولات حكمه بين سين وبين جيم = لارخت في يوم شَدّت حبلها تبغي المشام
عدْت اطالع في البدايه والنهايه والنديم = وابن سينا وابن خلدون وْموطأ هَالإمام
البصيره لي تقود العقل للراي السليم = ما يعرف النور شخصٍ جاهل بْأمر الظلام
التجارب معدن الرجّال بمْحَكّ الجسيم = الجسيم اللي يفكّ عْقودها لو هي جِسام
ذاك حتى لو جلس الدرب بيده يستقيم = واهَنيِّ الأرض تحته كلّ ماعزّم وقام
المحمد .. لي بحزمه عِلم يتسمّى حَليم = حِلمه اللي بْحَدّ وبْحَدّه يحِدّ مْن الحَرام
المحمد .. الحكيم اللي به الحكمه تقيم = لاعجب لو تعجب السبع العجايب به دوام
المحمد .. لو( حدايق بابل) توازيه غيم = له حدايق شعر نرجس ما تغطّيها الغمام
و(المسلاّت) بْعلوّ نجومها رْجال وْحريم = ما تعلّت فوق نجمه ساطعٍ لو قيل نام
وكلّها (اهرامات ) جيزه لي بها السِّر الكتيم = رامها باخلاق سَمْحَه بَالصلاه وْبالصيام
وبرج (بيزا) كان هو يُحْسَبْ عجيبه للفهيم = وش نسَمّيها بروجٍ ساسها كانت خيام؟!
وتاج علمه كالسّحَاب الموشلي مبسمه ديم = لو (محل هالتاج) يوقف قال باوقف له نظام
وذاك (سور الصين) شُيّد من زمن قافٍ وميم = عام ميتين وسبعتعشر على قيامه تمام
سوره الإسلام ممشى والصراط المستقيم = كلمته موقف ماهي صوره تعلّق أو حمام
و(المناره ) قامها (بطلِيمُوس) بْوصفه زعيم = عام ميتين وْثمانين وبقى منها الحلام
هالمناره لو درت بمحمد الشهم الشكيم = ما اغفلت عن نورها لآخر مواعيد الضرام
هالعجايب لو هو ثامنها باقول الله عليم = ما يكنّه من عجايب في معانيه ازدحام
ودّه وودّه ولكن الابجديّه كالنسيم = ما توفّي و لا تكفّي لو بكفّه هالكلام
المحمد .. من علوّه ينهل البحر الكريم = ومن سكوته في سكوته تقرا تاريخ الكرام
جيت له داعي أنا ما بين زمزم والحطيم = ميم حاء وْميم شدّه وْدال رمزٍ للسلام

صبري ملّني


لِمِّني في مَحْجَر عْيونك حبيبي وخلّني = خلّني آشوف نفسي في عيونك واطمئن
دامِك إن سَلْهَمْت بالرمش الظليل تْفِلّني = (لعنبو) ذا الرمش كيف انّي من اسبابه أجِن
حبّك اللِّي تَلّ قلبي من بَعَدْ ما تَلّني = صِدْق أنا ميّت بحبّك كانها عيونك كَفَن
إجْمَعْ اللِّي باقيٍ منّي شتات ودلّني = شوفني ذاك الغريب اللي يدوّر عن وطن
صَدّك اللي هَدّ حيلي والجفا لي علّني = ليه قلبين المحبّه بالمحبّه ما الْتِقَن
قلت ابـ اصبر والصَبِر من زود صبري ملّني = وقلت ابـ انسى واثر طيفك صار له عقلي سجن
ضاعت دْروب المحبّه والحزن ما ضلّني = يا حسافه ذي الليالي.. ذي الليالي ما انصفَنْ
لا تهلّ دْموع من عينك أخاف تْهِلّني = خايف أطْلَعْ من عيونك لا من فْـ يومٍ بكن