البارحه فزاع جاني فالمنام=وأحلى منام(ن) مرني في مرقدي
قال السلام وحي من رد السلام=يامرحبا مليون بك ياسيدي
من جيتك فاح البختري والخزام=وازهر نباته فالفياض الجرهدي
وقفت أناظر ..! وأتطلع للأمام= مشهد ... ولـــكن ما اجمله من مشهدي
قال اقعدي وش فيك ؟ يابنت الكرام= نبغى القصايد والبساط الاحمدي
فزاع أخاف أقعد ويلحقني ملام=واخاف تستكثر علي وتنقدي
والله جعل للناس مقدار ومقام=سنه وأنا بالسنه أومن ماجحدي
نخوه علامك جي يانخوه علام=يابنت خل الرمس عنج واقعدي
ابسألج وابغى الإجابه بنتظام=وان كان ودج تنشديني فانشدي
قال.. العرب والشعر واحساس الغرام=بالذات عنهم سولفي لي واسْـردي
قلت .. العرب حزب وفصايل وأنقسام=وكبيرهم فالعيد يـُنْـحَر كالهدي
وقلت ..الشعر أصله كلام(ن) في كلام=لا يرخي الطيب ولا يرفع ردي
والحب ..حب الله ونبراس الانام=وحب الضنا والدار والحب الندي
قال ..الرغيف اميدمه لج باليدام=اكليه يانخوه ولله احمدي
قلت ..آه تجرحني وأنا بوقت الصيام=وأنا المثل فالزهد يضرب بـْزهَـدي
مشكور وارغيفك على فمْي حرام=والله ماكل غير من صنعت يَـدي
احنا من الناس العفيفين العظام=من نسل بيت آل النبي المُـهْـتَدي
قال..العفو للبعض غايات ومرام=في ذمتي ما كان هذا مقصدي
نخوه وأنا لج بالدهر عَـضْـد وحِزام=خلاص وش همْج يابنت الاجودي
كــفــو .. يارمز الطيب ياشيخ المهام=الله يديمك لي ذخر يامسندي
ياشيخ واللي مات لله الدوام=ماعاد يرجع لو تَبشْـر بـسْعَـدي
والطير طار وفي سما الهجران حام=والحلم مات ..ومات بحشاه اولدي
والقلب كنه صرح واجسوره ركام=والعين غيمة حزن والدمع ابردي
والصوت يسجنه السكوت المستدام=محبوس فيني كل حرف(ن) ابجدي
والكحل عاف من المحاجر.. واللثام=لبس معي ثوب الحداد الاسودي
من كم عام بحسرتي من كم عام=عام(ن) مضى والله يستر من غَـدي
صدمني الواقع ولا أيت صدام=وغرقت في مركب همومي وانكدي
ابكي بلايا دمع من طعن السهام=واصرخ بلايا صوت هل من منجدي
وألَـبْس الاحزان ضحكه وابتسام=واطارد الفرحه ومني تشردي
وتتراقص احزاني مع نوح الحمام=لا غنت الورقى على الصوت الشدي
سؤال يانخوه قبل مسك الختام=سؤال في فكري يلوح ويرعدي ؟؟
يانـــخوه أنتي آنسه وإلا مدام= ردي علي وجاوبيني يابْــعَـدي ؟؟
أنا بقايا شمعه بعتمت ظلام=مدري .. أنا القمراء بليل(ن) سرمدي
أنا طفل مفطوم من قبل الفطام=مدري.. أنا المفطوم وأنا فـمْـهَـدي
وأنا الذي مجبور أعيش مع الهوام= مدري.. ولو ماني عليها بمْــحَـدي
وأنا ..وأنا اللي تهت في سكت زحام=ضاعت عناويني وضيعت ابلدي
مدري.. بلادي شمس يحجبها الغمام=وإلا قريبه للثريا والجدي
مدري .. و لـــكنــي من الحور الحشام=الزين يخضع لي خضوع ويشْهدي
أبوس راس العلم قدراً وأحترام=واسعى لجل عينه بعزمي واجْـهَـدي
وأسدل ستار الوصل في وجه الخصام=واطعن رقاب الغدر ووفي بـوْعَـدي
وما اختار من روس الطوال إلا السنام=وأن قلت أنا باصعد وربي لا صْـعَـدي
وأخوي لا منه تعزوابي وقام=جته القبايل والعرب تعدو عــدي

المشاركة الأصلية كتبت بواسطة صخر بن علي اليريـمي صح لسانكـ ,, قصيدتكـ كلماتها حلوة ,, ننتظر المزيد ,, تسلميــن اختي ’’ ,, يعني انت من آل البيت << يحظكـ ,, يسلمووووووووووو ,,

المشاركة الأصلية كتبت بواسطة سلطان الشتيلى صح لسانك واعتلى قدرك وشانك شاعرتنا نخوه والنعم فيج وفى نسبك الشريف اتحفتينا بهذه القصيده الرائعه ويكفيك فخر ان الحلم فى فزاع وهذا يدل على الخير ان شاء الله والقصيده تحتاج الى مفسر احلام اوشاعر كبير واعتقد ماراح احد يفسرها ..........غير فزاع اذا وصلت له والله يعطيج العافيه يثبت