منتديات فزاع - عرض مشاركة واحدة

#1 (**permalink**) 08-11-2007, 06:44 PM

آااه يا زماني
من تأليف: Emaaraaaaty
الجزء الاول
المكان : مدينه العين..
اهنيه يطلع ناصر من البيت وهو يقول في خاطره ما فيه عيشه احسن عن هالعيشه!!.. حشا مو حياه هذي.. هواشه ونقره كل يوم …وطلع ناصر من بيتهم للشارع وهو يفكر في المشاكل ياللي كل يوم يشوفها ويسمعها من ابوه وامه.. ابوه وامه دايما يتناقرون قدام عيالهم ومو ابعيده يضاربون في يوم من كثر المشاكل ياللي تستوي امبينهم
ناصر .. شخصيه حبوبه ..طيبه كثير .. متفاهم وراعي قلب كبير .. طيب الاخلاق والكل يحبه ..شكله وسيم .. نحيل القامه بشكل يبين من عيونه ياللي فيها سواد من تحت من كثر التفكير والهموم ياللي شايلها في قلبه ومن كثر الارق والسهر…عمره حوالي التسع عشر .. توه بادي بالجامعه…
روضه ..اخت ناصر.. تحبه لدرجه الجنون .. متعلقه باخوها كثير ..تحاول انها تفهمه بس صعب انها تفهم اسلوب ناصر الهادي الكتوم في كل شي …عمرها في حدود السبع عشر سنه….
بعد حوالي الساعه ثمان ونص بالليل ..و بعد صلاه العشاء .. يدخل ناصر البيت بعد ما هدا البيت من النقره والهواشه ياللي مستويه اليوم كله بين امه و ابوه ..يدخل ناصر البيت وعيونه من التعب تكاد انها تغظ بالنوم وهو واقف.. دخل ناصر عشان يلاقي اخته تنتظره واتسأله ..
روضه : ناصر وين كنت!! ..وليش طلعت من البيت … شكلك تفكر في الهواشه ياللي اتسوت بالبيت .. صح !!!..تراه شي عادي واتعودنا عليه من صغرنا وانته اكثر واحد عارف في الموضوع يا اخوي...
ناصر: ليش شكلي يقول جيه ..هاها *ضحك ناصر بس قلبه يعتصر على ياللي يستوي بالبيت*
يرد ناصر يسأل اخته روضه.. وعينه في السما فوووووووق: بسألج يا روضه ..تتوقعين اخوي سالم و اختي خاطره يعشون المشاكل ياللي انعيشها احنا في بيتنا .. ولا بيت يدتي هادي ....
(ابو ناصر كان متزوج من وحده ثانيه اسمها عفرا...ياب منها سالم وخاطره وطلقها واتزوج من ام ناصر بس ام سالم ياللي هي مطلقت ابوناصر تزوجت ومشان جيه عيالها عاشوا عند يدتهم لانها متعلقه فيهم بشكل ما يتصور ولا خلتهم عند ابوهم يعشون فتره طويله مشان مثل ما اتقول ان زوجه ابوهم بتظلمهم .. شكل العجوز اطالع فلام كثيره لا وبعد تندمج فيها...هاهاها(
ترد روضه وهي مستغربه: ناصر بسمله عليك .. شنو فيك .. هيه يا اخوي بيت يدتي هادي .. بس صدقني انه كأيب بشكل .. يوم ادشه .. استوحش .. كنه بيت ساكنته الاشباح .. بس الله يهدي اخواني.. يسمعون كلام امهم ويدتيه فينا .. تواشيهم يدتي علينا انا ماخذين ابويه منهم وهم مساكين تربوا على هالكلام .. وحنا اخوان مهما كان ..الله بس يهديهم...
ناصر : هيه ..والله صدقج ..يوم كنا صغار.. كل ما ايي ابا اللعب عند سالم يدتي اتروغني من البيت واتقولي روح يا ولد امك واللعب بعيد .. ما كفاك ياللي امك مسوته فينا وفي عيالي !!يدتي ما تحبنا ولا اطيقنا بعيشه الله .. سبحان الله كنا مو عيال ولدها مثل ما هم عيال ولدها .. شنو هالتفرقه العنصريه ياللي في عيلتنا ..
هنيه تمسك روضه اذن ناصر واتقوله وهي تبتسم مشان اتخفف عنه همومه....
روضه :ناصوري .. يا بطل .. وين وصلك تفكيرك ...هاهاها.. *هنا ينقلب وجه روضه من مزوحي لوجه حنون رقيق* افا عليك يا ناصر .. انته اتحط في خاطرك على يدتك .. مهما كان هي حرمه كبيره في السن وهي مهما كان يدتك .. وعمر الدم ما صار ماي يا اخوي ...وين هالابتسامه الحلوه ياللي معودني عليها ...
هنيه يتبسم ناصر ..ورد على اخته باستغراب ....
ناصر : ادري يا روضه .. بس انا مستغرب.. يلومونا احنا ..مهما كان احنا عيالهم .. والمفروض انهم اكبر منا وافهم في هالشي .. مو احنا انعلمهم هالكلام ...ومثل ما قال المثل . .ياللي اكبر منك بيوم افهم عنك بسنه ..هذيلا اكبر منا بسنين مو بايام و ليالي...سبحان الله !!!
ترد عليه روضه .. و اتقوله :اهيه يا اخوي ..ادري ..بس الانسان نساي ..وفيه من الناس الغضب يعمي قلوبها .. ومهما كان .. سالم البكر .. وهو اغلى واحد عند يدتك.. وهيه تحبه كثير وانته ادرى فيها .. حتى انها تحبه اكثر عن خاطره .. بس يا حليلها خطور .. كل ما بتلعب عندي ولا تكلمني يدتي اتروغها عني.. كاني باكلها .. رغم انا انحب بعض كثير .. بس الله يسامحهم...
يقطع ناصر كلام اخته ويقولها: اقول.. انا تعبان وما ابا اتذكر اي شي .. كل ياللي ابيه اني انام ولو مره في حياتي كلها... نومت بنادم شايل همومه في صندوق وقاطها في البحر.. صدقيني اني تعبت من هالسالفه .. والله اني تعبت ..
يروح ناصر لغرفته ياللي مظلمه بالحيل.. والبرد ينحس من ورى الباب .. غرفه كبيره وخاليه من الاثاث .. كل ياللي فيها فراشه وبعض الصور ياللي معلقه في الجدار .. هذيك الصور لهم كلهم .. ابو ناصر وامه .. سالم .. خاطره و روضه وهو .. هذيلاك الصورقديمه وايد... صور يوم قبل لا تستوي المشاكل بينهم وبين يدتهم بس كان الكل يبتسم و يضحك في هذيك الصور .. بس الماضي غير والحاضر غير .. الماضي بالنسبه لناصر حلم .. حلم جميل .. بس يا خساره .. الاحلام تحولت لكوابيس .. كوابيس قلبت حياتهم كلها ....
هنيه يمسك ناصر دفتر قديم .. من قدمه يبين انه ناصر كان يستخدمه من زمان .. الكتاب لونه ازرق .. عليه نقشه باللون الفضي ... النقشه تحت عنوان .. *ليت حظي مرة يصدق معاي*..
ياخذ ناصر القلم ويبدى ينقش على كتابه كلمات من خوافي جوانحه واتقول الكلمات ....
أه من ضيجه باتت مسهرتني ... وعبرة في اليوف تشعل لواهيبه
قامت الدموع عالخدود يهملني ... والظنون تلعب بالقلب تلاعـــيبه
في حين كان ناصر يكتب هذيه الكلمات سمع ضرخه في البيت ... انها امه .. تصرخ صرخه بتشق الارض من قوتها... رمى ناصر بالقلم والدفتر ليفتح الباب وإذ بامه تفتح الباب قبله .. وتنظر في عينون ولدها وعيونها قد احمرت في تلك اللحظه من هول ما سمعت على الهاتف .. نظرت في عين ناصر .. نظرات يكاد قلبها ان ينفطر من الحزن .. ام ناصر .. تمسك بذراعي ناصر بقوه ثم تحتضنه بقوه لدرجه كادت تقطع ظهر ولدها من الحزن ياللي في قلبها...وهي تبكي بشده وتتنهد وتقول له..
ام ناصر : .. ناصر ..ارجوك .. قولي اني احلم.. ناصر دخيلك كني احلم قومني من هالكابوس ..
ناصر بستغراب ويكاد القلق والخوف من الخبر يوقف قلبه ....
ناصر :امي ذكري الله .. سمي بالرحمن .. بسمله عليج.. خير انشاء الله .. شنو ياللي مستوي .. امايه دخيلج تكلمي قولي شي.. ابوي ياه شي !!... حد من خوالي ياه شي .. الرويضي وين ..!!!
ام ناصر : لا يا ناصر .. امي يا ناصر .. *وتكاد الكلمه تقطع قلبها من داخل* امي يا ناصر عطتك طوله العمر ..
وهينه اطيح ام ناصر من البكى تحت ناصر وهي تبكي .. وناصر واقف فوق امه وهو منه مصدق .. امي شيخه توفت !!مو صج .. امي دخيلج قوليلي انج اتسولفين ... *ناصر وهو يبكي بحرقه * امي تكفين .. امي واللي يرحم والديج .. قوليلي انج اتسولفين ..
ام ناصر الدموع موسخه البرقع .. : لا يا ناصر .. يا ليتني اقدر امزح .. بس شنو اقلولك .. شنو اقولك غير انا لله و انا اليه راجعون...
هنيه ناصر تدمع عيونه و يبدى يجهش بالبكى بالحيل .. كانت جدت ناصر تحبه كثير .. كان كل ما بكى و لا ضاق صدره راح ليدته و اتكلم معها وكانت هي الوحيده ياللي تفهمه و تخفف عنه همومه .. كانت الملاك ياللي كل ما حزن دخلت الفرحه لقلبه .. وكل ما بكى مسحت دموعه من عيونه .. كانت الام والاخت و الرفيج له .. كل ما ضاق .. يروحلها و يفشي همومه معاها .. عمرها ما قالته انها ماله منه ومن مشاكله .. بس الموت حق .. والكل بيذوقها .. بس فيه ناس متقدمه وفيه ناس متأخره...وهاي سنه الحياه...
هنيه ناصر يستعيذ بالله .. ويذكر ربه .. ويقعد عدال امه .. يواسيها .. يذكرها بالقضاء والقدر .. وانه مهما سوينا االبكى ما يرجع الاموات .. ..اهنيه .. تجلس ام ناصر .. وترد الشهاده على وجها .. تحمدالله على كل شي .. والدموع تنهمر منها ..
مرت ايام العزا .. والكل يا وعزا لانه شيخه انسانه محبوبه عند الكل .. والكل يحبها و يقدرها .. العزا كان في بيت ولدها حمد..
مرت ايام العزا .. وفي بيت ابو ناصر واتحت الغافه ياللي في نص بيت ابو ناصر ..الوقت كان تقريبا بين المغرب والعشاء... كان ناصر وامه يالسين تحت الشيره .. ام ناصر كانت حاطه راسها على ريول ولدها ناصر ..وناصر يالس يمسح شعر امه ويكلمها بحنان الولد لامه ..
ام ناصر : ابوك وينه؟... شكله من طلع الصبح من البيت ما رد ...
ناصر : والله يا امي ما ادري !.. بس اكيد في بيت يدتيه .. دوم هناك عندهم.....
ام ناصر : احنى ما استوت المشاكل امبينا لين هذيج العيوز ادخلت في حياتنا ..اول شي اخذت سالم و خاطره مني .. رغم انه ما يت مني زله عليهم ..اعملهم احسن عنكم.. بس الله يخذها ويفكنا من شر هذي العيوز النحس ..ابوك كل ما يسيرلها يجيني مشرش ويفك حرته فيني .
ناصر : امايه .. انتي بعد الله يهديج .. ما تخذين ابويه بالسياسه .. بدل الكلمه تعطينه عشر ..
ام ناصر : .. عشر ولا غيره ..والله اني متحملته عشانكم .. ما ابالكم حياه مثل سالم وخاطره .. مساكين هذيلاك العيال ..والله اني ارحمهم .. لا عند اهل ولا شي.. في بيت ساكنته السكون .. الينانوه... اعوذ بالله من هذاك البيت .. والله لو يعطوني اياه ابلاش ما اخذته ..
ناصر : .. ليش !!!.. خايفه اتنامين فيه ويونج السكن والينانوه ..هااهااهاهاهاها..
ام ناصر : .. هاهاها.. لا يا لويدي .. ما بسكنه لانه فيه ريحه العيوز النحس .. الله يفكلنا منها قريب ...
ناصر :.. امي .. ذكري الله .. بس قوليلي .. عسا ما تقولين هالكلام على يدتي قدام ابوي ..
ام ناصر : ..والله تبا الصدق ..هيه .. اقولها ولا عليه من ابوك ولا من هاذيج العيوز....
ناصر...:الله يهديج يا امي.. والله مو غريبه اشوفكم في يوم تذابحون انتي وابويه.. ولا اتضاربون في الشارع براااا بعد.. انتي ماسكه التاوه .. وابوي ماسك الملاس وكلكم تضربون بعض .. هاهاها.. لج كلمتي انه ما حد بيوقف يتفرج عليكم في الشارع لان العالم تعودت على هواشتهم انتي وابويه.. هاهاها..
ام ناصر ..: هاهاهاهأ.... لا وبعد انا بالتاوه .. وابوك بالملاس .. و في الشارع !!!هاهاها.. والله يا وليدي ضحكتني وانا ما ليه نفس في الضحك .. ولا العالم مو مهتمه بعد!!والله لو يضاربون اليهال بتلاقي المهنده متجعين و يالسين يطمشون .. ما بالك بعرب كبار .. هاهاهاهاها... والله ليبون كميرة فيديو ويصورنا ويحطونا في* السي حن حن* هاها...
ناصر .. : هاهاها.. اولا اسمها *السي ان ان * مو السي حن حن ..هاهاها.. وثاني شي والله صرنا مفضحه عند الجيران .. الكل صار يتكلم علينا.. حتى انهم تعودوا على هدتكم .. ولو يوم ما مر فيه هده ولا هواشه ..تلاقي الجيران يين يطمنون علينا ان كنا احياء والا اموات.. لانه بيتها فيه ازعاج وهواشه اربع و عشرين ساعه في كل ايام الاسبوع ....
ام ناصر .. والله يا ولدي ما ادري شنو اقولك .. انا من هذيج السنه يتنا مطلقت ابوك (عفرا) في البيت عند يدتك وانا حاسه انها ناويه على شر ..اصلا هيه ما اطيقني بعيشه الله.. ولا تحبني قبل زواج بابوك .. شنو رايك يوم الا اخذت ابوك .. والله اني اذكر انه ياني خبر انها متحلفتلي اني ما ذوق الهنا عند ابوك ..بس انا وكلتها ربي هو ياللي بياخذ الحق من الظالم ....
ناصر .. : .. يا امي .. الناس وشايه .. اني لا اتصدقين كل ياللي انقال لج .. بس تبين اصدق....
ام ناصر ..: هيه يا ولدي .. قولي ياللي عندك .. عيال الزمان هذا سحره .. يعرفون اكثر عن شيبانهم ..
ناصر: هاهاها.. سحره ولا ينانوه.. لانا احنا عيال الوقت هذا نقرى ونعرف امور انتوا تجهلونها.. بس المفروض انج تاخذين ابويه بالسياسه ..لانه الهده والهواشه هذي صارلها سنين .. اكثر عن 13 سنه .. بسكم هواشه .. وقفوا الهده .. واعلنوا وقت للهدنه ..
ام ناصر :.. وشو وشو .. هدفه .. وشوه هدفه ... !!!والله يا وليدي طالع تستسفسه وايد .. .
ناصر : هاهاها.. امايه .. هيه اصلها هدنه .. يعني وقت للنقاش والتفاهم مو هدفه .. و ثاني شي يقولون فلسفه مو تستسفسه..هاهاها..
هنيه يدخل ابو ناصر وعيونه تطاير شرار... و يمشي كانه بياكل ياللي قدامه .. اول شخص حاطه في باله ام ناصر .. .... متوجه والشر طالع من عيونه .. كنه مو ناوي على خير ..

الجزء الثاني
يوم شاف ناصر ابوه مقبل عليهم همس لامه وقالها : يا ياما تكفين.. ابيج اترحبين باويه بتراحيب كنج ما شفتينه من سنين .. سوي هذا مشان خاطري ...
هنيه ترفع ام ناصر راسها صوب ابو ناصر.. ويوم شافت ابو ناصر مقبل .. قالت لناصر: ناصر!..والله يا ابوك اليوم مو على سنعه .. شكله مو ناوي على خير .. ..احس انه ناوي على شر ...
ما كملت امه كلامها الا ابو ناصر رافع العقال ونازل على ام ناصر به!!.. وفي لحظه بصر يدور ناصر بين امه وابوه.. ويكلم ابوه ..و يهديه ..بس ابوه ما كان الاولي .. كان في نظرت عيونه بروده قاتله وكنه تحت التخدير.....وامه تصرخ وتخبي نفسها ورى ولدها ناصر .. وتصرخ بربها ياللي خلاقها ..وناصر لانه كان جسمه نحيل كان من السهل على ابوه انه يشله من دربه بعد ما عطاه حقه من لكمات و طرقات ويرميه بعيد عن دربه ... ام ناصر ما كان عندها الحين من يحميها من قدام ابو ناصر .. ما درت غير ابو ناصر لاف العقال على رقبتها وشاد عليها يبى يقتلها به ...
سمعت روضه صرخات امها من داخل الغرف.. وطلعت براا مسرعه بتشوف شنو السالفه.. واذ بأبوها يريد يقتل امها وناصر هوه ياللي يحاول يحمي امه من ابوه.. ما صدقت عيونها ياللي اتشوفه.. روضه مسكينه من الصدمه طلعت من البيت بلا شيله ولا شي.. تربع في الشارع حافيه .. والدموع موسخه خدودها البيض ياللي مثل اللولو ... ما درت بنفسها غير برا البيت وفي الشارع ..تربع لبيت يدتها على امل انها تلاقي من بيلبي على امها لا يقتلها ابوها.. وهي تبكي وتصرخ.. وصلت روضه لبيت يدتها لانه ما كان بعيد عنهم.. ودخلت الصاله واذ بيدتها يالسه في الصاله على القهوه وعندها خاطره و سالم ..ترمي روضه نفسها على صدر اخوها سالم وهي ما تقدر تتنفس من كثر الركض.. ومن البكى وبعيونها المدمعه تقول : يدتي ..سالم.. سالم.. لحقوا على اابوي!! ..لحقوا على ابوي!!!
يفز سالم من مكانه وهو يقول : وش فيه ابوي ..!!!
وتصرخ خاصره : ابوي شنو فيه .. ياه شي .. اي مستشفى .. وين استوا الحادث !!!
يدتهم بوجها المصدوم وبنبره حاده : بسم الله عليه.. بعيد الشر ..*وتلتفت العيوز على روضه وبنبره قاسيه اتقولها* وش تبين انتي يياتنا وما لبستي لا شيله ولا عباه.. مو منج !!! والله هذا من امج ياللي ما عرفت اتربيج ..
هنيه تصرخ روضه على يدتها : خلينا من كلام السب واللعن .. سالم .. تكفى الحق على امي .. سالم دخيلك .. ابوي بيقتلها .. .
اهنيه يدتها اتقاطعها بوجه مصدوم : كيف !! بيقتلها.. وينهم الحين.. انا قلتله انه يأدبها ما يقتلها !!شكل ابوج خرف صار ما يفهم الرمسه ..
تقاطعهم خاطره بصرختها : انتوا بترمسون انيه وابوي بيقتل عمتي .. لحقوا عليهم وبعدين بتخذون راحتكم في الكلام .....
ويقوم الكل وطلع يربع في الشارع وحطين بيت ابو ناصر بين اعيونهم.. وتشاء الاقدار انه حمد *خال ناصر* رايح زياره الاخته ام ناصر و يدخل بدخله الجميع.. واذ باخته تنخنق قدام اعيونه.. وناصر هوه ياللي يبعد ابوه عن امه.. بس امه بدت تختنق ويحمر ويها من قوه العقال على رقبتها ..
ناصر وهو يصرخ على ابوه ويبكي: يا ابوي .. اذكر الله .. يا ابوي بتقتل زوجتك ام عيالك ...
سالم وخاطره ويدتهم ما صدقوا ياللي يشوفونه.. ابو ناصر صار وحش!! شكله مو الاولي ياللي طلع منهم من فتره ..ما دروا غير بهذاك الريال ياللي يدور بين ناصر وابوه.. ويرفع ابو ناصر في عالي السما ويحطه في التراب.. يظربه ويبعده عن ام ناصر ياللي من التعب ما قدرت اتقوم من مكانها...يالله يالله تقدر تتنفس ..ناصر ما صدق ياللي يشوفه.. من الصدمه ياللي شافها انه ابوه يريد يقتل امه وامه طايحه على الارض شبه ميته.. وانه خاله صار يضرب ابوه مثل المينون.. رفع عيونه للسما كنه في عيونه عتاب.. كنه في عيونه ذبح اخر امل كان يترجاه علشان كل شي ينصلح بين اهله.. اهنيه يطلع ناصر من البيت.. يربع في الشوارع.. هايم ما يدري وين يروح.. كل ياللي يقدر يفكر فيه انه يبعد عن البيت ياللي انقتلت فيه امه بايد ابوه .. *كان هوه يعتقد انه ابوه قتل امه .. ما درا انه امه اغمي عليها .....*
في بيت ابو ناصر.. يقوم حمد يشل اخته على السياره.. ورضه تركب عند امها في السيت الوراني وتبكي عليها وتكلمها لعل وعسى اترد عليها ولو بكلمه اطمنها.. ويودونها مستشفى التوام باسرع وقت ممكن يدخلونها العنايه المركزه..لانه الحرمه صار عندها اختناق .. ما قدرت انها تاخذ كميه الهوا المطلوبه بعد الخنق ياللي ياها من ابو ناصر ..
ابو ناصر.. شبه جثه في الحوش.. لا حي ولا ميت وسالم يبلل راسه ويسقيه بالماي.. كان ابو ناصر يطالع بعيون في السما.. ما يتكلم ..كل ياللي يقدر يشوفه ويسمعه صوت النسيم ياللي هب عليهم في البيت وهز اغصون الغافه ياللي هو طايح تحتها.. قام سالم ركض للبيت وياب السياره.. وشل ابوه المستشفى.. امه وخاطره يبكون في السياره من هول هذيج المشكله ..ودخلوه العنايه ياللي فيها بعد ام ناصر ياللي مسكينه ذاقت الموت من ابو ناصر جرعات جرعات ....
في هذيج اللحظه.. ناصر يمشي في الشارع .. هايم ..ما يدري ياللي استوى بعده .. كل ياللي يعرفه انه ابوه قتل امه .. وكل ياللي كان يشوفه هو عيون امه ياللي تترجا فيه مشان ينقذها من ابوه لا يقتلها.. وكل ياللي يسمعه هوه صوت صرخات امه ياللي خف صدها بعد الخنق ياللي جاها من ابو ناصر ..مشى ناصر ومشى.. ما يدري وين يسير .. كل ياللي يعرفه انه خلاص صار بلا بيت ولا اهل.. كل ياللي بقاله اخته روضه .. ياللي بتسكن عند يتدته ..وهو يدري انه يدته ما تحبه ولا اطيقه .. فليش يرجع لبيت ما له اي قيمه فيه .. هذا كان تفكير ناصر ياللي مات الامل من قلبه .. مات كل شي يسبب السعاده في هالدنيا .. نسي انه السعاده في الاقتراب من دين الله .. في كل شي يامر به الرحمن.. بس خبرته في الحياه كانت قليله ..لا تكفي للعيش في الخارج بيتهم..كان كل طريقه ياللي يعرفه هوه من بيته للمدرسه ومن المدرسه للبيت ..واذا طلع في يوم.. طلع لبيت يدته شيخه.. بس يدته شيخه ياللي كان يسميها اول امي ماتت .. ماتت وخلفت وراها احزان في صدره ما له من يشلها معاه..
اهنيه .. يوقف ناصر ويلقى نفسه جدام جبل النقفه جنب الصناعيه .. ما درا المسافه ياللي قطعها لانه كان يمشي بلا احساس.. يمشي وهو ميت الشعور ..طلع ناصر جبل للاستراحه ياللي فوق هناك للمقهى.. كان يالس يطالع الانوار ياللي اطل على مدينه العين.. كانت عيونه تدمع والكل ياللي موجود كانوا يطالعونه ..كان ياللي منهم يشفق عليه ..وياللي يالس يأشر عليه وينكت ..ما دروا غير هذاك الشاب ياللي يرفع صوته عليهم ويقولهم بصوت عالي كانه بيشق الارض من قوه صوته :شنو الطالعون!! عيب عليكم!! يمكن الريال عنده ظروف مأثره عليه ..!
قام احد الشباب ياللي بالمقهى وقاله انته شنو دخلك !!!! .. ما اتشوف الدلوع يالس يبكي .. يريد امه تعطيه الحليب !!!!
وبين ضحكات الشباب و على رفع اصوتهم على ناصر يوم يالس يبكي ..ما هيه الا لحظات بصر.. ولا يلاقي هذاك الشاب نفسه تحت الطاوله مرقوع بلكمات من ناصر .. والشباب ياللي عنده يحاولون يبعدون ناصر عن خويهم.. بس من ما قدروا على ناصر .. اختلف ناصر وحش.. لا شعور لا احساس ..لانه هذاك الشاب غلط على اغلى انسان عند ناصر .. وهذاك الشاب ما كان يدري شنو ياللي مستوي على ناصر ..قاموا الشباب ورفعوا ناصر من خويهم بعد ما عشا خويهم بكوس لين كسر نص طقم الاسنان ياللي فيه .. ..
اهينه كان واحد يطالع كل شي من بعيد.. كان حاط عينه على ناصر من دخل وهو يبكي .. كان يحاسب على خطواته ناصر.. على طريقه مشيته .. على كل شي .. كان في عيونه الشر .. وكان هذا الشاب ناوي على شي ما كان اجميع يتوقعه.. لانه هذاك الشخص كان لابس لبس محترم .. طريقه كلامه لبقه .. اسلوبه مثقف .. اشياء كانت من برا توحي على انه ولد عز .. بس مثل ما يقول المثل .. *من برا يالله يالله .... و من داخل يعلم الله *... يا ترا شنو هذاك الشاب ناوي .. وعلى شنو ناوي .. الله اعلم ..
كان هذا الشاب عينه على ناصر... كان ناوي على شر ... فلما شاف الشباب قاموا كلهم ضد ناصر لانه ضرب خويهم .. وقف هذا الشخص ..وتوجه مباشره للشباب ياللي كانوا ماسكين ناصر ويريدون يضربونه .. وصل الشاب ومسك ناصر من نصهم .. وقالهم علومكم يا شباب .. شي في خاطركم .. !!!
جاوب واحد من الشباب بعصبيه و غضب وقال :.. وانته راز ويهك ليش .. !!! ... يقربلك هذا العله !!!.. ..
جاوبه الشاب ياللي كان ماسك ناصر بكل بروده ..وقالهم ..: هيه يقربلي .. شي في خاطركم .........!!!!
نظر ناصر للشاب بنظره استغراب!! .. اول مره يشوفه فكيف يقوله انه يقربله .. شكل ابو الشباب ناوي ياخذ قسمه من العشا ياللي بيعشونه ناصرمن بكوس وضرب.. بس هذاك الشاب غمز لناصر بطرف عينه عن لا يتكلم او يقول شي ... فهم ناصر قصده وسكت ويلس يسمع ..
رد عليه الشاب بغضب: وليش من الصبح ما قمت يوم بدى رفيجع علينا !!!...
رد عليهم الشاب.. انتو ياللي بديتوا .. يالسين تضحكون عليه .. ورد عليكم .. احنى العايله كلها كذاك .. نتغدا بخلق الله قبل لا يتعشوا فينا.....
هذا زاد غضب الشباب اكثر ... : قالوا للشاب ..خلاص .. ذوق عشانا انته واحكم !!!.. احلى غداكم يا بوا لشباب والا عشانا ...
ما زاد عليهم الشاب غير انه دخل ايده في جيبه .. ونظر الكل بنظره خوف انه لا يكون عنده سلاح في جيبه لا شي .. رجع بعض الشباب ورا من الخوف ..
وقالهم: ابركلكم انكم تنهون السالفه على خير.. ولا من شاف ولا من دري .. و تراه انا ما عندي لعب عيال .. ولا اضيعون وقتي ..... تبون العزا في بيت من يكون قبل !!!... ويأشر على واحد منهم كان كثير الكلام عليه وعلى ناصر....
ويقوله : انته يا ابو الشباب .. جرب كان فيك خير .. تراه اللعب يحلو اكثر يوم يوصل للجد...
قام وحد من الشباب و قال ..: هاها.. يعني بتقتل عيال خلق الله وتطلع منها مثل الشعره من العجينه !!!!
ما كلمهم الشاب ... كل ياللي سواه انه ضغط على زر في جيبه ... وسمعوا الشباب صوت ابواب سيراته تفتح والليتات تولع و تبند ... طالعوا الشباب .... اذا بسياره شبح اخر مديل وعليها رقم ثلاثي احمرخفيف*سهل يعني* .. عرفوا من قصده انه راعي واسطه .. انه يقدر يطلع من السجن باسهل طريقه.. حتى يمكن انه ما يدخل السجن لانه ولد عز مثل ما هو ابين عليه من شكل ومن طريقه كلامه .. .....
اهنيه يقولون .. لا .. ما تسوى انها توصل لهالدرجه .. وطلعون الشباب من المقهى والكل يالس يولم في الثاني انه هذاك الشاب خلاهم مضحكه قدام اهل المقهى .....
اهنيه يطالع ناصر للشاب ويشكره ويقوله ...: .. مشكور يا مخاوي شما .. فيك الخير .. والله لا كنت تعشيت ضرب غير ياللي اتعشيته ..
نظر الشاب لناصر وقاله .. : تراه مو كل ياللي يتكلم يسوي ..!!... انته منو اسمك !!!.. انا خالد ....
ناصر : انا اسمي ناصر .. بس قولي ما اتخاف انك تتلوعوز بسبب السلاح ....!!!!!!!
خالد وهو يضحك ....: هاهاهاهاها .. أي سلاح .. !!!!!
ناصر .. السلاح ياللي في جيبك .. انته قلتلهم انه عندك سلاح ..!!! صح ولا لا !!!
خالد: وانا قلت جيه ولا هم فهموها جيه!!.. تراه ما عندي سلاح لا اتخاف .. وانا ما بورط نفسي وبقتل خلق الله بكل هالسهوله .. تراني بس اخوفهم .. هاهاهاهاها
اهنيه يضحك ناصر .. : ويعرف انه الدينا فيها سياسه .. اخذ وعطى .. مو بس هواشه مثل ما يشوف في بيتهم ..
خالد : ناصر .. تعال .. تعال ايلس ويايه .. ضايج وابا اسولف عند حد من مثلك و شرواك .. قلبه طيب و يفهم خلق الله ياللي من مثلي .. يولسون خالد وناصر على الطاوله.. ويكلمون.. بس ناصر ما نسى ياللي استوى هذي الليله .. بس كان ما يريد احد يعرف بالموضوع .. ِ
في مستشفى التوام .. وبالليل مثل ما اتعرفون .... وفي قسم العنايه المركزه ..الكل موجود هناك .. روضه وخالها حمد ...وسالم وخاطره و يدتها .. الكل يالس خايف من النتائج.. لانه الطبيب توه داخل يشوف ويشخص ابو ناصر وام ناصر .. بس روضه كانت خايفه على امها اكثر .. لانها بدت ما تهتم بابوها .. واتقول في خاطرها هو سبب كل شي.. امي دوم تتعب واتسوي كل شي يرضي اي زوج .. وهو يجازيها بالهده و النجره كل يوم .. انا نفسي طايبه نفسي منه .. خلاص .. امي بس اتقوم بالسلامه ... بنسكن عند خالي حمد .. انا تعبت من هالحاله ....امي تتعب و تشقى ابوي يجزيها بالخنق والتعذيب...واتقول في نفسى يا فاعل الخير لا يزيت خير.. روضه بدت تحمل في خاطرها على ابوها و الدموع تنهمل منها كنه نهر.. مني اتراضي نفسها وادور لابوها اعذار .. ومر اتلومه على فعلته بامها .. ومن كثر التفكيروجها صار تعبان من كثر ما فكرت وكلمت نفسها.. .....
الكل يالس ينتظر الدكتور في هذيج اللحظه وصلت عفرا ام سالم وخاطره .. جت وهي مسرعه الخطى .. جت و هي حامله في قلبها الشيطان .. او من وصلت بكت.. وعانقت يدت سالم وخاطره ويلست تتحمدلها على السلامه وانه انشاء الله كل شي بيصير بخير .. وسلمت على ولدها سالم وخاطره .. يوم التفت على روضه كشرت بويها وقالت: انتي هنيه.. ما كفا ياللي امج مسوته!! .. حتى انكم فضحتونا قدام الله وخلقه ...
عفرا يلست اتعق كلام وما كنه المصيبه تخص ورضه بعد ..كنها هي وامها سبب المشاكل .. اهنيه يقاطها سالم و قولها: يا امي .. احنا في المستشفى .. مو ناقصين فضايح واعوار راس ...ورضه اختنا و مصابها مصابنا.. ومثل ما هو ابونا... هو بعد ابوها .. ولا تنسين انه امها بعد في العنايه ...!!
انيه يقاطعهم الدكتور بطلعته من قسم العنايه المركزه ... يتلقاله سالم ومن عنده .. والكل كان خايف من النتائج وخصوصا نتيجه ام ناصر .. لانه حالتها اصعب من حالت ابوناصر .... تقدم حمد اخو ام ناصر وسأل الدكتور ...
حمد :... طمنا يا دكتور .. عسى ام ناصر ما فيها شر .. وشو عملتولها .. وشنو ياللي لقيتوه فيها!!!
الدكتور : ... هممممممم .. انته تقربلها شي !!!!... ما صله القرابه ياللي بينك و بين المريضه ...!!!
حمد : انا اخوها .. هذيلا عيالها و اهلاها .. بشر يا دكتور ...عسى المريضه بخير ........
الدكتور : والله يا اخوي ما بكتم عليك .. حلتها تعبانه .. وخصوصا انها مخنوقه ...بس انشاء الله بتتعافا بعد كم من يوم .. بس انا لازم اتصل بالشرطه واخبرهم بالموضوع ..
حمد: ليش يا دكتور !!تراه السالفه ما تسوى شرطه و فضايح .. تكفى يا دكتور .. خل الموضوع سري و خاص ... انته تعرف السمعه و قيمه الستر ...
الدكتور .: يا ليت يا اخوي اقدر اسوي شي .. بس انا بعد عبدٌ مأمور .. واذا انا كتمت قسم الشرطه التابع للمستشفى بدري وبتمشكل انا بعد .. وانا مو ناقص مشاكل يا اخوي الكريم.. اسمحلي والله ما اقدر... لازم ابلغ الشرطه ....
اهنيه سالم يقاطعهم ويسأل الدكتورعن ابوه ....
سالم : .. دكتور .. دكتور .. اسمحلي على المقاطعه .. بس طمني على الوالد ..
الدكتور بأستغراب ..: .. اي واحد!!! .. لا يكون ياللي فيه الكدمات البسيطه .. !!!
سالم: كدمات بسيطه !!!.. دكتور .. ابوي يوم جبناه كان ما يتكلم و قليل تنفسه .. شبه مشلول !!!
الدكتور: يا اخي .. جان ابوك هو ياللي جنب غرفه ام ناصر .. تراه ابخير .. وبطلعه اليوم انشاء الله .. لا اتخاف عليه .. عاد التنفس طبيعي ميه بالميه.. بس الغريبه انه ما تكلم .. والفحوصات اتقول انه مليون في الميه سليم .. بس ليش ما يتكلم ما ادري والله ..
سالم : لا يكون تعبان وانتو ما سويتو الفحص المطلوب !!!
الدكتور : لا يا اخوي .. ابوك صاحي .. بس شكله عنده مرض نفسي ولا شي ...
اهنيه خاطره اتقاطعه واتقوله ..: لا يا دكتور .. ابوي عمره ما حصله شي يبين عليه انه مريض نفساني .. صح انه في نجره و هواشه مع عمتي .. بس دايما من ايينا يكون مره مرح و فرحان و مزوحي ...وعمتي ....
اهنيه اتقاطعها امها عفرا بعصبيه شديده واتقولها : .. عماً يعميج انتي وعمتج .. واتسمينها عمتي عقب كل ياللي وسوته في ابوج !!!
اهنيه اتقاطعها روضه بغضب شديد :... عفروووووووه .. احترمي نفسج احسلج وعن الغلط على امي .. تراج زوتيها وانا متحملج .. والعمى يعمي مقلت عيونج ويا هالعيون كنج ضب طالع من صربه!!..
اهنيه ترفع يدتهم صوتها على الكل وتقولهم: فضحتونا الله يفضحكم .. بسكم هده .. كفانا فضايح .. وانتي يا روضه ويا عفرا .. وش ياكم .. تتهاوشون كنكم عدايل ...عيب عليكم ....
هنيه تنقلب عفرا لقطه وديعه قدام العيوز تستسمح منها وتراضيها .. بس كانت تعطي روضه نظرات حقد وغضب .. خاطره لاحظت نظرات امها الحقوده لروضه من يوم ما داشت عليهم غرفه الانتظار .. بس كانت تدري انه امها ما اتحب لا روضه و لا ام روضه .. وما كانت تدري انه امها مخبيه اشياء اوسخ من الحقد وغيره ..
يرد الدكتور على خاطره ويقولها .: .. لا يا اختي .. ابوج شكله مو مريض نفساني .. وانا اعرف المريض من وصف هله له في حياته العاديه .. جاوبيني .. !!.. متى يتغير ابوج .. !!.. قصدي متى اتحسون انه يتغير ..
خاطره اترد على الدكتور: .. والله يوم يجينا ما اشوف فيه تغير .. بس اسمع انه يتهاوش معى عمتي كل يوم في البيت .. !!!. *وتنظر خاطره لروضه واتسألها *... رويضي ..قوليلي .متى يتغير ابوي .. !!
روضه باستغراب: اول ما يدش البيت !!... يتغير لونه .. وبدا الغضب يطلع على عيونه ... كنه غضب الدنيا على راسه .. حتى من غير لا امي اتكلمه ولا حتى اتقوله شي ..!!!!!!
الدكتور ... : سبحان الله !!... هذا كنه سحر .....!!!!
اهنيه عفرا يتغير لونها .. وترفع صوتها .. سحر!!!... اكيد هذي من ام ناصر .. شكلها هي ياللي مسويتله سواه .. ادري فيها ..
اترد روضه تقاطعها بصوت مرتفع ..: .. سحر يكسر ريولج ...!!.. انتي ما اتيوزين ... كله على امي .. وليش بتسحرابويه .. تراه زوجها .. ولو كانت هي ياللي ساحرته ما كان هذي حالتها هي و اياه .. *وهنيه تبدى روضه بالبكى وهي اتقول*.. لوبتسحره كان سحرته انه يخدمها ما يخنقها .. ياللي يا امي يكفيها .. وانتي ان قلتي كلمه فوق كلمه على امي .. والله لا اتلومين الا نفسج يا ام دويس...
هنيه اتخاف عفرا .. وتسكت .. وتفكر شنو يالسه اتقول من الصبح .. وترد واتقول .. خلاص .. كنه سحر انا سايره المطوع بكره الصباح وشوفه كنه مسحور بيطلع وكنه مريض نفسي هم بيطلع .. وبنشوف من الصدج يا روضووووه .......
وهنيه اتقولها العيوز .. خلاص . انا بسير معاج .. ودي ارتاح انه وليدي ابخير ولا فيه شي .. بس انشاء الله يكون بخير وعافيه .. *اعنيه ترفع العيوز يديها بنظره تكسوها الحزن والرجاء لرب العالمين واتقول*.. يالله يا ربي انك تشفى وليدي .. يا لله يا ربي اني داعت وانا راضيه عليه .. وهنيه تبدى تبكي العيوز ...
روضه اوله مره اتشوف يدتها تبكي .. اول مره اتحس ان يدتها عندها مشاعر .. يوم شافت روضه يدتها تبكي لاول مره في حياتها .. حضنت روضه يدتها بحنان وهي تبكي بصوت خفيف .. لا اتخافين يا يدووووه .. ابوي بقوم بالسلامه .. ولاول مره يرق قلب العيوز .. وتبكي في حضن بنتها .. هذا الشي اسعد سالم وخاطره انه يدتهم بدت اتحب روضه .. وانه قلبها لان لروضه .. بس هل عجب هذا عفرا ياللي يلست تنظر لروضه نظره كلها حقد و كره اعمى ...
وفي المقهى .. ناصر يالس عند خالد .. يتكلمون عن الدنيا و عن الزين والشين فيها .. اهنيه يبدى ناصر يرتاح لخالد ويفرح انه لقى انسان طيب ومثالي مثله .. وتمنى انه كان يعرفه من زمان ..
اهنيه يطالع خالد ساعته ويقول : ... اوووووووووووووه .. تأخرت على بو تركي .. شكله بيزعل عليه ...
يطالعه ناصر باستغراب :.. منو هذا بو تركي .. !!!..
خالد .. : هذا واحد من الشباب .. موصيني بشغله .. والحين لازم اعطيه ياها ..بريد تخاويني ..!!!!
ناصر بعد ما تذكر انه ماله بيت يسيرله : .. هيه .. ليش لا .. على الاقل اعرفك اكثر ..
خالد بنظره خبيثه وفيها نتصار ..: تمام .. يالله اركب السياره .......
يركب ناصر ويا خالد ويسيرون داخل الصناعيه.. كل شوي يتغزر في الصناعيه .. لأماكن مظلمه و موحشه .. لين وصلوا لمكان ما فيه بشر ولا عالم .. بقعه مقطعه .. بقعه تخاف الينانوه انها توصلها .. انيه يستوحش ناصر.. يبدى قلبه ينبض بشده .. بدا يخاف ويستوحش .. اول مره يدخل مكان مثل هذا .. واتخيلوا .. من اول مره يطلع من البيت فيها يدخل مكان مثل هذا .. يا ترى شنو ياللي متخبي لناصر في هذا المكان !!!!!....
هنيه من بعيد يشوف ناصر سيارة جيب شيروكي ابيض .. يلمحه من بعيد ... لانه الليله كانت قماري .. يبدى خالد يقترب بالسيارة صوب الجيب الشيروكي ..ما هيه الا لحظات والا خالد مغير اتجاه السياره صوب الطريق مره ثانيه وهو يصرخ في ويه ناصر بخوف وعصبيه شديده وهو يقوله : ... امسك.. امسك .. ترانا ملحوقين ..!!!
ناصر بخوف شديد !!:من منو ملحوقين ....!!!.. بس انشاء الله ما يكونون الشباب ياللي متهاوشين معاهم !!!!
خالد بنظره عصبيه صوب ناصر :اي شباب اي خرابيك ... تراه ورانا الشرطه يا السبال ...!!!.. طالع تحت كرسيك .. بتلقى كيس صغير .. طلعه .. بسرعه ....!!
ناصر ...: الشرطه !!!!... ليش ... !!!... شنو مسوين احنا !!!!! *كان ناصر خايف انه الشرطه يدورون عليه بسبب قضيه امه و ابوه ...*
هنيه خالد يعصب على ناصر ويصرخ عليه وهو يقول: .. اقولك قم شوف الكيس الصغير ياللي تحت الكرسي .... والله اني كنت شاك انه الليله ما بتعدي على خير!!!..ويهك مو ويه خير !!
ويقوم ناصر من مكانه مستعيل ... ومرتبك في نفس الوقت ...وفتش تحت الكرسي .. ويقول لخالد ... ما لقيت شي!!... السيت نظيف ولا فيه اي كيس!!...
خالد وهو يطالع مره للطريق ومره لناصر وهو مرتبك بالحيل ... : انا مـتأكد انه تحت الكرسي ..طالع تحت الكرسي مره ثانيه .. بس الكيس بيكون معلق على الكرسي من فوق.. بسرعه .. بسرعه ..!!!!
ناصر بخوف شديد يفتش و يدور تحت الكرسي ياللي كان يالس عليه ... وامبين اصابعه يحس في شي ناعم كنه بودره .. ما توقع اي شي ... بس بدا يقول لخالد.. تراني لقيته ..بس شكله كنه بودره اطفال !!!!
خالد يقول لناصر بخوف !!... : طلعه بسرعه .. شكل الكيس مثقوب!!... طلعه بسرعه ...
ولما طلع ناصر الكيس .. شاف انه شي يشبه الطحينه !!.. ما عرفها .. بس لما شاف انه السيارات بدى عددها يتزايد وراهم .. بدى الخوف يتسلل لقلبه .. وبدى يسأل خالد ..!!
ناصر: .. خالد .. ليش الشرطه اتلاحقنا!!!.. أنته مسوي شي !!!!.....و وشو هذا الكيس !!!
خالد بنظره استعباط واستهبال :.. لا ماني مسوي شي .. .. بس قولي انته قد سويت شي !!!
ناصر بكل براءه .. : لا .. بس ليش تلحقنا كل هذيلا السيارات...
اهنيه خالد يفقد اعصابه .... لانك خبل يا الخبل .. بقولك شي .. اذا قبضونا الشرطه ... نهايتك ما بتكون بياض ويه .. بس انا عندي حل من المشاكل هاذي كلها !!!
ناصر باستعجال كبير ...: تكفى شنو الحل ...!!!!
خالد بنظره خبيثه :... هذا هوه حلي يا ناصر .. هذا هوه حلي ...
ويفتح خالد باب المرسيدس ياللي جنب ناصر بسرعه .. ما درا ناصر بنفسه غير برا السياره هوه والكيس ابو البودره ياللي كان معاه بعد ما دفعه خالد براا السياره مشان يضحيبه للشرطه وينحاش هوه ..
ناصر طايح على الارض ما يدري شنو السالفه .. ما درا غير انه السيارات تتقرب منه بسرعه عجيبه ..ويتقدمها الشيروكي الابيض .. وفوقه الونان مال الشرطه ....وناصر ما لقى قدامه غير هذيج البقعه ياللي غاديه كلها حصى و تراب يجري فيها من الشرطه .. حاول انه يجري بكل قوته بس من أثر الدفعه ياللي دفعها اياه خالد ما قدر .... ما لقى غير الشيروكي مقوف جنبه ويحاول الريال ياللي داخله انه يقبضه .. ناصر بدى يربع في هذيلاك السهول بتعب و ارهاق شديد .. ومن الخوف نسي الكيس معاه .. ربع و ربع .. بس مسكين .. اول شي قوته كلها خسرها في المشي من بيتهم وثاني شي في المشاجره ويا الشباب ياللي في المقهى وثالث شي طايح من السياره وهيه اتسير .. بدت قواه اتخور .. وبدى يلقط النفس بصعوبه شديده ..
في هذيج اللحظه .. يطالع ناصر صوب سياره خالد ياللي مقفيه وهيه مسرعه مثل الرصاصه .. ويقول في نفسه .. : الله لا ردك يا خالد على من ينتظر رجوعك ياللي بليتني بها البلوه .. الله ياخذ الحق منك يا خالد !!...
ما هيه الا لحظات والا سياره من الشرطه تصدم سياره خالد من ورا والا سياره خالد منقلبه عدة قلبات .. وبدت سيارات الشرطه تحاصر سياره خالد !!!....
هنيه يقف الشيروكي الابيض .. ويولع الكشاف الكبير عليه .. صار ناصر ما قدر يشوف شي من حوله بسبب الكشاف .. بدى يحاول انه يركز على طريقه .. ما قدر .. بدى التعب يبان عليه .. اهنيه بدى يشوف طيف يقطع طريقه من النور للظلام صوبه.. طيف ما يبين عليه ملامحه ولا اي شي .. كل ياللي يقدر يشوفه انه شخص بدى يقطع النور صوبه .. اهنيه بدى التعب و الارهاق ياخد من ناصر مأخذه .. ويطيح ناصر غشيان من غير اي مقاومه للشرطه .. ..
وفي مستشفى التوام ..يبدى الجميع يطمأن على ام ناصر وابو ناصر .. الحين اطمأن الجميع على انه ام ناصر حاتها استقرت ..ويقوم الدكتور ويطلب من الجميع المغادره لانه ما احد يقدر ينام عند المريض يوم يكون المريض في العنايه المركزه ...
اهنيه ترفض روضه انها اتسير ...و اتقول : .. انا ما بترك امي بروحى .. بيلس في غرفه الانتظار .. لين امي اتقوم بالسلامه ...
اهنيه تقاطعها اختها خاطره :...رويضي .. استهدي بالله .. يلستي في الغرفه ولا كنتي معاها امج ما راح تدريبج .. وانتي بتعبين حالج على الفاضي ... روحي واستريحي عشان لما اتشوفج عمتي .. تحس انج مرتاحه وانه ما شي متعبج .. ولا انتي تريدينها تتلوم فيج يا غناتي يوم اتشوفج تعبانه بالهشكل !!! *وتنظر خاطره لاختها بنظره كلها حنان ورحمه*
روضه :لا يا خاطره ما ابا امي اتشوفني بهالحاله .. بس شنو اسوي .. ما ابا ايلس في البيت ابروحي .. اريد اطمن على امي اكثر .. حتى اني متأكده انه النوم ما بييني يا خاطره في بيتنا ...
تقاطعها عفرا بنظره استهزاء .... : .. يالله يا الدلعوعه .. كنج خايفه من السكون والينانوه لا ايونج ... لا اتخافين!!! .. انتي اتخوفين بلاد باكملها ولا اتخافين .. بس لا تتدلعين على يدتج .. تراه ياللي فيها مكفيها ...
تقاطع خاطره امها واتقولها .. : .. اصلا رويضي ما بتسير لبيتهم بروحى .. انا بسير معها ولا هيه بتنام عندي في الغرفه الليله ..*وتظر خاطره ليدتها بنظره كلها استرجاء و طلب انها ما تخذلها واتفشلها قدام روضه *...
فهمت اليده طلب خاطره .. وقالـت: .. احنى ما عندنا بنات تنمن بروحن في البيوت .. !!.. يالله شللي اغراضج و يالله لبيت يدتج.. مو نقصين بلاوي بعد.. والبيت بتقفل و باخذ انا مفاتيحه لين يقومون اهلج بالسلامه .. الله لا يخلا هذاك البيت من هله ..
خاطره رويضي من الفرحه ما وسعتهم الارض .. اوله مره بيشتركون في غرفه وحده .. يحسون انهم صج خوات .. يتشاركون في كل شي .. في الغرفه في البيت في ادواتهم الخاصه .. يحسون انهم خوات في كل شي .. مو بس بالاسم ..عفرا ما ارتاحت لكل هذاك الكلام .. وقررت انها تدس سمها ابين الاخوات .. مشان ما يجتمعون ...بدت تفكر في خطط مشان تنشر شباكها على العايله كامله ...
ولما طلعوا من المستشفى .. شافوا من بعيد سيارات الاسعاف واصله وفيها شباب اثنيه ....وسمعوا الشرطه يقولون انهم مسوين حادث في الصناعيه .. واحد منهم حالته خطيره ...والثاني فيه كدمات بسيطه .. ولا عليه اي مشاكله ثانيه.. اهنيه بدى قلب روضه ينبض بسرعه .. ما درت ليش .. كل ياللي اجا على بالها اخوها ناصر .. بس انشاء الله يكون في البيت ينتظرهم.. ولا في بيت يدته ينتظرهم مشان يسمع اخبار امه وابوه رغم انها متأكده انه ما بيسير لبيت يدته لانه يعرف انها ما اتحبه بالمره ....
وفي الطريق .. سالم وخاطره واليده وعفرا و روضه ... في سياره وحده .. وبدت خاطره تسأل امها ..
خاطره ..: امايه .. كيف دريتي انا في المستشفى ...!!! وعمي سعيد وينه الحينه هوه واخواني ..!!
عفرا: .... والله يا بنيتيه ..اتصلت لبيتكم .. شلته الخدامه ..قالتلي انكم طلعتوا مستعيلين وخاصه انها قالتلي انه سالم اخذ السياره وطلع من البيت مستعيل ... وانا اعرف انه ابوغنيم عاقل.. ما يسرع الا لشي ضروري .. وتصلت فيه وهو قالي على كل السالفه .. وعمج سعيد وعياله ساروا المهرجان ويا اخته وعيالها .. وقالي اذا بسير وانا ما طعته قلتله اني بسير لبيت ابويه والا ازوركم اليومين هذيلا وهو وافق
ولما وصلوا البيت نزلت العيوزمن السيارة لبيتها ..وقفت تتامل وطالع لمكان بيت ولدها .. كان مظلم... كانه اهله ميتين .. اهنيه بدت العيوز تبكي.. تبكي وكنها حاسه انه الموت قرب على عايلتها .. بدت تكلم نفسها و انتقول .. يا ليت كل شي يرد مثل ما كان .. ام ناصر وابو ناصر ما استوى شي امبينهم !.. ابدت العيوز تبكي بمراره.. بدى الكل تهل دمعاتهم من الحزن .. غير عفرا .. كانت تناظر على العيوز بنظرات استغراب .. كلها استغراب وتعجب .. كن ياللي كان مستواي من العيوز نفسها مو من اي شخص ثاني.....لاحظت لهالمره بعد خاطره امها انها غريبه التصرفات .. غريبه الاسلوب .. كنه امها مخبيه شي عنها .. حتى انها ما نست انها تريد تعرف كيف اطلقت امها من ابوها .. وشو السبب .. وشنوالقصه ياللي امها مخبتها !!بدت خاطره الاسأله تسيربها و تردها .. ليش امي بعد ما اتزوجت من عمي سعيد ما نست ابويه!!! .. هل هيه اتحبه !!..واذا حبته ليش تدّخل في حياتنا وتنسى انها متزوجه وعندها عيال!! ...وتبدا الاسأله اتسيربها وترها عند باب مقفول .. باب وهو من الماضي... باب من الماضي ...بس فيه كل الاسرار و البدايات لهاي المشاكل كلها.. . يا ترا منو ياللي عنده هذا المفتاح لباب الماضي!!.. هل هيه امها!!..مستحيل !!.. لانه امها ما تحب تتكلم عن الماضي .. وتعتبره انه تدخل في خصوصياتهم ولا تريد انها تتكلم فيه .. يا ترا منو ياللي بيجاوب على تسألتها.. والمفاتيح عند اربعه اشخاص .. امها ياللي ما بتتكلم عن الماضي .. وعمتها ياللي اتصارع الموت.. ابوها ياللي شبه ميت ولايعرفون وشو السبب... ويدتها ياللي الحزن معذبها !! ..وهنيه رجعت لنفسها و قالت ... هيه .. يدتي!! .. ادري انها بتزعل وبتعصب .. بس اكيد بتغلط في الكلام .. خاصه انه الحين مرتبكه وتعبانه نفسيتها .. انا لازم احل هذي المشاكل . .. حتى ولو تدخلت في خصوصيات الكبار .. انا بنتهم .. وليه الحق اني اعرف كل شي .!!!!
اهنيه روضه تقاطع تفكير اختها :
روضه: .. خطووور .. انا بسير البيت .. اخاف ناصر في البيت ينتظرني وانا برا اهنيه .. انشاء الله بس تكون اعصابه هديت .. مسكين والله !!!.. هو ياللي حظر المشكله من اولها .. انا اريد اعرف منه كل شي استوى بين امي و ابويه ... و بنيب اغراضنا من البيت ...
خاطره : .. خلاص . .. انا بسير وياكم .. برتب اغراض ناصر من البيت مشان ينام عند سالم في الغرفه ....
سالم : حووه انتم !!.. كنه البيت ما فيه ريايل .. بتسيرون و بتردون بشوركم هو !!.... انحنى في نص الليالي .. بسير معاكم .. ركبوا السياره.. انا بعد اريد اخذ اغراض ابويه مشان انشوف لنا محامي ولا احد يتوسط لبويه مشان المشكله هذي .. روضه !!!... تدرين وين مفتاح خزانه ابويه !!!...
روضه : .. لا... بس اظن اني بنلاقيه في اغراض امي ... بس قولي .. انته تعرف احد مشان تتوسط لابويه !!..
سالم : لا بس انشاء الله الامور بتكون ميسره ..
ويسيرون خاطره وروضه و سالم للبيت .... وفي هذيج اللحظه تستوحد عفرا بالعيوز ... وبدت اتشرشها على ام ناصر مره ثانيه.. وعلى انها السبب في بلاويهم .. وبدت تبث السم في جسد العيوز مشان تكره ام ناصر مره ثانيه بعد ما بدت تلين وتتقرب من ام ناصروعيالها..في هذيك اللحظه ... خاطره و روضه يتشوفون لناصر في البيت .. بس ما لقوه في البيت .. شكله من طلع ما رد البيت .. بس مع منو بيكون ناصر..هل هو بيبات عند واحد من رفاقته !!!... بس ناصر عمره ما خاوى اي احد .. بس قالوا انه اكيد في بيت خاله حمد .. لانه متعلق فيهم كثير ..وبدوا ياخذون الاغراض الاساسيه ... مثل ملابس وغيرها من الاغراض الاساسيه .. روضه بدت ترتب اغراضها .. سالم يدور على مفاتيح الخزنه .. وخاطره يالسه اتعدل اغراض اخوها ناصر .. بس اي اغراض .. كل ياللي في هذيج الغرفه ملابس و صور قديمه لهم .. والكتاب الازرق!! بدت خاطره تفكر شنو ياللي في هذاك الكتاب .. كل الغرفه فاضيه .. ما فيها شي .. وهو الكتاب الوحيد ياللي موجود في الغرفه .. ناصر ما كان يطلع كتب الدراسه الا يوم بيسير المدرسه ....كانن كل الكتب في الكبت !!!.. فكرت خاطره انه هذا الكتاب فيه اشياء تخص شخصيه ناصر الغامضه .. قالت في خاطرها انه هذا الكتاب يعز عليه .. بس باخذه وبحفظه له ..
في هذي اللحظه تصيح روضه على ختها كنها خلصت ولا لا ... كنها خالصت تريدها انها تساعدها ..
ترد خاطره .. : هيه انا خلطت .. ثره شي في هذي الغرفه يتعب .!!!!
روضه بستهزاء ..: .. شكلج تعبتي من كثر الاغراض .. تعالي شلي شي بيسط من عندي . هاهاهاها...
وتقوم خاطره وتساعد اختها في ترتيب اغراضها ... اهنيه يدخل عليهم سالم الغرفه ويقولهم .. : بل بل بل .. حشى من غرفه هذي .. بوتيك .. روضوه .. أنتي فاتحه مخزن ولا صج هذي ملابسج ...هاهاها.. اقول انتي بتيلسين بس بالكثير اسبوعين .. مش اكثر ... ويدوووه بتعطيج الكرت الاحمر بعد هذيلاك السبوعين . .لا تاخذين البيت كله ..هاهاها..
تضحك خاطره من سوالف سالم ياللي يسويها حتى في احزن الاوقات .. وروضه يالسه تطلع لسانها على سالم و تتمصخر عليه ..
وهنيه سالم يبدى ينكت على روضه .. روضووه .. ما تبين تاخذين من المطبخ سامان بعد!!!.. شكلج بتاخذين البيت كله ..!!
روضه ...: هذا مو شغلك .. يعني انتو يا الريايل ما عندكم اغراض!!!
سالم : عندنا بس مو مثلكم يا النسوان .. حشى .. تريدون شحنات نقل بس مشان اغراضكم انتو بس .. شوفوا اغراضنا حنا يا الريايل .. ما شي .. بس كندورتين و وزار وفنيله داخليه .. هاهاها.. يا حليلنا ... والله انا مساكين ..
روضه بدمها الخفيف ووجهها الباسم : ما لوم الذباب لا مر جنب واحد منكم يطيح من زين الريحه .. ريحتكم تشق الارض . .. مبيد نووي ... حشا.. انتو لو تدخلون غابه .. تخلفون وراكم ضحايا من كل انواع الدواب .. هاهاها..
سالم وهو يضحك .. : يالله شكلكم مصدقين اعماركم .. كنكم تنبتون زهور وانتو تمشون على الارض...هاهاها..
تقاطعهم خاطره : شكلكم ما بتخلصون اليوم .. انا بسير لبيت وبرتب الغرف لناصر وروضه .. ناصر بيبات عندك في الغرفه .. ورويضي عندي .... ويالله استعيلوا و بلاش لعب عيال .. وخل عنك كثر الكلام... ويالله ... حصلت المفتاح!! ..
سالم : لا بس بيي بكره و شوفه انا وريضي.....وانتي من قال انج بتطلعن ابروحج في هالوقت .. كلنا بنسير مع بعض .. لا تستعيلين .. الليل طويل تراه ...
خاطره ..: خلاص ياللي استعيلوا .. تراني ابا ارتب البيت ..
سالم : .. خلاص انا بوديج الحين وبرد على روضه لين تخلص تحميل البيت كله !!..هاهاهاها..
روضه : .. هيه .. البيت كله وبيت الجران بعد .. يالس تطنز حظرتك ..
سالم .. : لا بس احب اعصبج . هاهاها.. ياللي انا بسير اودي خاطره وبردلج بس الاقيج جاهزه ...
ويسيرون خاطره وسالم البيت وهم حاملين اغراض ناصر.. .ويوصلون للبيت وتنزل خاطره من السياره ويرد سالم لاخته روضه مشان يرجعها البيت .. وقبل لا تدخل خاطره البيت .. لقت انه الباب مفتوح وامها يالسه تتكلم بصوت خبيث ونبره احتقاريه للعيوز ..وبدت خاطره تسمع كلام امها ياللي مثل السم في اذن يدتها ..بدت تسمع كلام ما سمعته في حياتها.. كلام ينقال عن ام ناصر للعيوز .. هذا ياللي كان يزيد الطين بله بين ام ناصر و ابو ناصر!!.. ما صدقت ياللي سمعته ... اهنيه بدت بعض الامور تتوضح .. ما صبرت على بقيه السالفه عشان لا يوصل سالم و ورضه وتتغير العيوز على روضه ياللي من الفرحه ما وسعتها الارض انها صارت قريبه من يدتها وان انشاء الله كل شي يتصلح في هاي الفتره بينهم.... ومشان العيوز ما تتشرش مره ثانيه على ام ناصر .. وياللي استوا المفروض يكون درس للكل .. بس امها بدت تكشف القناع الوديع ياللي تلبسه قدام الكل.. هل هذي صج امها ولا شخص ثاني . .خاطره ما صدقت .. ضربت الباب بقوه والدموع تذرف من عيونها .. ما صدقت انه اما سبب كل هاي المشاكل .. سبب تعاست اخونها و ابوها .. سبب حزن الكل .. دخلت البيت وهي اتقول: كل هذا يطلع من راسج يا اياما !!!.. كل ياللي نمر فيه من تحت راسج
اهنيه.. امها ما صدقت انه خاطره قاطعتهم و سمعت كل شي .. كانت امها في وجها نظره تفاجؤ .. ما عرفت شو اتقول .. تلعثم الكلام و ظاع في جوارحها .. اهنيه ترفع عفرا راسها وهيه اتقول .. : خاطره .. غناتي .. انتي هنيه !!!!! كنا انا ويدتج نتكلم في موضوع ابوج و امج و كيف السالفه استوت ..
كانت عفرا تحاول انها تغير الموضوع .. بس خاطره سمعت كل شي .. وما قدرت اتصدق ياللي كانت تسمعه ..
اهنيه خاطره اتقول لامها والدموع تخرس خدها مثل نهر.. بدت الكلمات تطلع من خاطره وهي متعذبه.. بدت الكلمات تطلع بصعوبه .. صوت البكى غطى على صوتها في الكلام و هيه اتقول: يا ياما.. ما هقيت انج في يوم تهدمين حياتنا!!.. ما هقيت ان ام تهدم مستقبل عيالها بايدها.. ما هقيت انه في يوم اشوف الانسانه ياللي احبها واقدرها اكثر عن عمري وروحي تكشف قناع من سم يجري في شرايين العايله !! ما هقيت انه الشمس ياللي طول اعمرنا ننتظر نورها اتكون هيه النار ياللي تحرق ضلوعنا ..
حاولت عفرا انها اتهدي بنتها .. العيوز مو امصدقه ياللي اتشوفه بين عفرا وبنتها يستوي .. من مشاكل اليوم كله !!! بدت المشاكل في بيتها بعد!!!... كملت خاطره كلامها الحرقه تقطع اظلوعها ..
خاطره يختلط الكلام بالعبرات: ليش يا يما!!!! ليش كل هذا !!!!... احنى شنو ياللي سويناه فيج حتى تهدمين حياتنا بأيدج !!! انتي ياللي لازم تبنينها مو الشخص ياللي يدمرها .. يا يما اذكرج انا عيالج و بنصير عيالج ..بس انتي ياللي تبريتى منا !!...
عفرا.. وهي تبكي و تحاول اتهدي بنتها ...: خاطره .. ياللي فيني مكفيني .. لا اتزيدين حزني .. انا اسوي كل هذا مشان خاطركم ..
خاطره وهيه مستغربه والدموع غطت عيونها: اتسوينه مشان خاطرنا!!.. مشان خاطرنا اضحين بحياه انسانه كل ذنبها انها تزوجت ابويه !! اتضحين بابويه مشان خاطرنا!!.. يا يما اضخين بسمعتنا مشان خاطرنا!!.. يا يما يكفيني ياللي سمعته.. يكفيني ياللي شفته !!... يا يما بدل لا تحضنينا كلنا و اتضمينا في حضنيج ياللي انحرمنا منه واحنا اصغار!!! تقلبين حياتنا على روسنا مشان سوالف قديمه !!!!!! وقصص قتلها و دفنها الزمان !!!!
اهنيه عفرا بكت بحرقه .. بكت و ما قدر الكلام يطلع منها لانها اول مره ابشوف بنتها تبكي بحراره .. اول مره تحس انها صج ضيعت عيالها بافعالها .. واللي زاد بكاها ان خاطره ذكرت شي عن الماضي ياللي طول عمرها كانت خايفه منه .. ياللي طول عمرها تحاول انها اتخبيه عن عيالها .... كانت خايفه من هاليوم انه عيالها يعرفون ماضيها .. بس الظاهر انه الحين انكشف كل شي !!.. انكشف و على لسان بنتها سمعت كل شي ... الظاهر انه خلاص ما عاد لها لزوم في حياة عيالها .. كبروا بلا و جودها والظاهر انهم ما يحتاجولها الحينه .. الظاهر انها بدت تهدم حياتهم وهم كبار بعد ما هدمتها وهم صغار ..نكست عفرا راسها .. نكست راسها وهيه تبكي .. عرفت انها انكشفت .. لا و المشكله انه بنتها قالت اشياء و اشياء عن الماضي.. بس كيف عرفت .. كانت تدري انه خاطره بتعرف في يوم لانها كانت تسأل كثير عن اشياء من الماضي .. والظاهر انه يدتها قالت شي ..واشياء و اشياء بدت تدور في بكر عفرا و هيه تبكي ...
تلتفت خاطره صوب يدتها .. التفتت و في عيونها عتاب و حزن ما قد شافته العيوز طول عمرها في خاطره .. بدت العبره تخنق خاطره .. عجز الكلام يطلع عنها .. بس بكل جوارحها تبكي خاطره وهيه اتول ليدتها :انتي يا كبيره العايله!!.. انتي ياللي تجمعين الكل واتفرقينهم باشاره منج.. انتي ياللي كل الحاره تحترمها وتقدرها ..انتي ياللي تعبتي وربيتي!!.. عجبج ياللي استوى .. عجبج ياللي سويتيه بايدينج ياللي طول عمرها كانت حنونه!!.. ياللي طول عمرها كانت تعطي ولا تاخذ.. ياللي طول عمرها مسحت دموع وضحكت شفاه عمرها عاشت في الحزن.. انتي يا كبيره العايله اتسون جيه باولدج!!.. بضناج!!.. بوحيدج!!.. تهدمين حياته ويا زوجته ام عياله !!تهدمين ساس اني ياللي لازم تصوينه بدل لا تهدمينه بايديج!!!
العيوز بنظره طلب حزينه صوب خاطره ...بنظره طالب قول ولو كلمه .. بس خاطره قامت اتقول كلام يصحي ضماير ماتت من سنين .. صدى صوتها هدم جدران غطاها الجليد .. صدى صوتها ارتفع في سما لليل كساه الظلام .. بدت تبكي خاطره و الدمع قريب لا يختلف دم .. سكتت امها .. سكتت يدتها .. عجزوا انهم يقولون اي شي لانه الكلام ياللي يسمعونه الحقيقه .. الكلام ياللي يسمعونه الصدق.. الصدق ياللي طول عمارهم يستنكرون من و جوده ..تسكت خاطره والعبره تخنقها اكثر واكثر .. يسود جران البيت صمت رهييييييب.. صمت البكى من كل فرد فيه .. صدى العبرات و البكى ساد المكان .. وفي هذيج اللحظه يقطع صدى صمت الحزن صدى ضحكه روضه و سالم برا و هم مجبلين للبيت من السياره حاملين اغراضهم .. اهنيه خاطره تنظر لامها و ليدتها بكل حزن ...واتقول :.. شوفوا حياتنا يوم بس نلتقي.. شوفها كيف.. رغم انكم تريدون انكم تهدموها بيديكم الا انا بنحب بعض ... و لا عمرنا بنكره بعض .. اخواني من ابوي بيضلون اخواني .. اجتمعنا تحت اسم واحد ياللي هو اسم ابوي .. وبموت تحت هذاك الاسم .. رضيتوا ولا لا .. وعيد و اذكركم بكلمه طول عمري اسمعها والحين اقولها لكم و انا و اثقه من معناها .. عمر الدم ما صار ماي .. عمر الدم ما صار ماي ..
وتطلع خاطره من الصاله .. تطلع بدخلت سالم و روضه .. شافتها روضه .. شافها سالم .. بس ما عرفوا الموضوع ... ضنو ان يدتهم وبختلها على شي .. امها كلمتها في شي .. بس اول شي دار في بالهم انه شي استوى بالمستشفى .......
روضه بصدمه في وجها .... : ... يدوتي .. !!!... امي ياها شي!!! .. ابوي ياه شي !!!!!!...
سالم بثبات و تصلب ...: روضه استهدي بالله .. شوفيكم كلكم تبكون .. شنو ياللي مستوي !!!! خير انشاء الله !!
عفرا اتقاطع كلام عيالها: لا ما شي استوى .. بس انا رفعت صوتي على خاطره الانها تكلمت معى الدكتور وانا اضايقت من هالشي .. المفروض ما تتدخل في كلام بين الريال ...
سالم والراحه بدت على وجهه انه اهله ما ياهم شي ..: واني يدتي ليش تبكون ... !!
عفرا وهيه تمسح ادمعوها ..: ما شي تذكرنا حالت ابوك و بكينى .... عن الكلام الزايد .. يالله سيروا ناموا انته اختك روضه .. مشان انسير للمطوع بكره ونمر اشوف حالت عمتك و ابوك !!!
روضه ما صدقت ياللي سمعته .. ولا حتى سالم .. عفرا ياللي طول عمرها ما اتحب روضه لا امها تتكلم بلطف عنهم !!!... اما غريبه هاي الدنيا!!.. ليله وحده تقلب كيان العايله!!.. ليله وحده اتبكيهم فرح وحزن.. هذا كان تفكير روضه!!.. ما صدقت ياللي سمعته وياللي اتشوفه!!
طلعوا سالم و روضه وهم يسولفون ويضحكون.. يطلوعون السلالم الضحك والسوالف ابمين الاخوان تتعالى ..و لاول مره ينسمع ضحكات في البيت .. اول مره تسمع جدران البيت الصماء ضحكات في ضلوعها ياللي صول عمرها حملت الظلام في داخلها .. ياللي حضنت دمعات الاسى و البكى في جوانحها .. بدت حتى الجدران الميته بنشاط داخل البيت .. اول مره بعد سنوات يتنشط البيت و لو بضحكات بريئه بين اخوان جمعهم الحب و بيفرقهم في هالحياه الحب الطاهر ياللي عمره ما تكدر بعوامل ياللي مكدره جو الكبار .. !!!!
خاطره هذيج الليله ما نامت من البكى و الحزن .. روضه كانت تتظاهر انها نايمه رغم انها مو مرتاحه لبكى اختها .. في بدايه دخولها حاولت انها تفهم من اختها شي .. بس ما قدرت .. بس ظلت سهرانه تنتظر الصباح عشان اشوف شنو تقدر اتسوي حق اختها ..
وفي الصباح .. لاول مره في البيت ينحس انه نور دخله .. تقوم العيوز بعد صلاه الصبح مشان تطلع الصاله .. تسمع في البيت خرخشه .. وقراقيع .. و اصوات .. البيت طول عمره هادي .. بس شنو هذا الاصوات ياللي بدت في البيت ...!!! نزلت العيوز من الغرف ياللي فوق للصاله ...سالم و روضه قايمين.. وخاطره معاهم ..بس عفرا ما قامت من النوم.. اول مره اتشوف سالم و خاطره يضحكون على الريوق ... طول عمرهم ساكتين ما يتكلمون على الريوق.. اول مره اشوف عيالها الضحك مالي عيونهم.. شفاههم ياللي كانت قبل تهتم بملي بطونهم والطلعه من هالبيت للمداس ولاشغالهم بسرعه.. اليوم شي متغير في البيت.. شكله منور !!!.. شل الحياه اندبت فيه لاول مره بعد سنين !!.. بدت العيوز اتفكر .. واتفكر ..يقطع تفكيرها ترحيب روضه بقدومها عليهم ..تقوم روضه من مكانها وسالم وخاطره قاعدين.. قامت و باصت راس يدتها وصبحتها بالخير.. العيوز ما كانت متعوده على هالشي!!.. انه احد يبوص راسها على كل بدايه صبح .. هلت دمعتها من احساس غريب جرى في شراينها !!...ما عرفته .. هل هو فرحه!! او من حرمان ولقت من يشبعها فقدانه !!!.. خاطره نظره الحزن في عيونها اول ما شافت يدتها .. رغم انها كانت اتمثل على انها فرحانه الا انه سالم و روضه كانوا ما يخلونها لحظه لحزنها ...
سالم و في عيونه ابتسامه .. يطالع ليدته و لروضه و هو يقول ...: يدتي .. لا تاكلين من الريوق .. ولا حتى اتمسينه ..
العيوز بأستغراب :.. ليش يا وليدي .. !!!.. فيه شي ..
سالم والابتسامه مقطعه شفايفه : .. هيه فيه شي .. روضه قايمه من الصبح ومسويه الريوق .. شاي .. ...و قهوه الزعفران ياللي اتحبينها !!
العيوز ولاول مره تضحك قدام عيالها: ههاهاهاها.. يالله يغربل بليسك يا سالم .. وشو فيها .. بنتي و قامت و سوت ريوق حق اخوانها و يدتها .. ما فيها شي يا وليدي ..!!!
سالم وروضه وخاطره.. ما صدقوا الكلام ياللي سمعوه.. اول مره العيوز اتقول بنتي حق روضه!!.. خاطره ما صدقت.. بعض الهم ياللي كان فيقلبها انزاح.. بدوا الكل يضحك ويسولف.. سالم ينكت من طرف.. وروضه تسولف من طرف.. ولاول مره العيوز تحس بالسعاده داشه بيتها.. في هذيج الحظه تدخل عفرا.. ونكسر وتهدم كل شي ..يسكت الكل.. سالم يطالع في امه .. روضه تسكت عن سوالفها ..خاطره اتقوم من مكانها واتسير لغرفتها وهي تتغذر انها بتدل ملابسها مشان اتسير المستشفى .. لاحظت روضه نظرات العتاب ياللي في وجه اختها .. بس ما حاولت تدخل يا لين يهدى الجو .... وتهدا اعصاب اختها ...
سالم يبتسم لامه و هو يقول : هلا و الله بهالوجه الصبوحي .. مرحبا بروح ورحي.....حياج يا يما .. قربي قرب وليدج ..ضناج.. حبيبج ..